Tre cocktails, tre profile të ndryshme dhe një pikë e përbashkët.
Ka shishe që i lidhim menjëherë me një mënyrë të caktuar konsumimi. Disaronno është një prej tyre: shija e tij karakteristike njihet lehtë, por në gotë mund të marrë drejtime shumë të ndryshme.
Mjaftojnë disa përbërës të thjeshtë për të kaluar nga një Sour i balancuar, te një Fizz i freskët e deri te një Mule me karakterin pikant të ginger beer. Pikërisht këtu qëndron ideja e këtij edicioni të "Një shishe, tre shije": të zbulojmë sa ndryshe mund të shijohet e njëjta shishe.
Tre receta të thjeshta për t'u përgatitur edhe në shtëpi, bazuar në recetat zyrtare të Disaronno.
1. Disaronno Sour: balanca mes ëmbëlsisë dhe freskisë
Sour është një nga mënyrat më të mira për të parë një anë tjetër të Disaronno-s. Limoni sjell aciditet dhe freski, ndërsa shurupi i sheqerit e rrumbullakos shijen. E bardha e vezës është opsionale, por nëse përdoret i jep cocktail-it teksturën e butë dhe shtresën karakteristike të shkumës.
Rezultati është një pije e ekuilibruar, ku ëmbëlsia karakteristike e Disaronno-s mbetet e pranishme, por nuk dominon gotën.
Përbërësit
• 50 ml Disaronno
• 25 ml lëng limoni i freskët
• 5 ml shurup sheqeri
• E bardhë veze (opsionale)
Përgatitja
Vendosi të gjithë përbërësit në shaker me akull dhe tundi mirë. Shërbeje në gotë dhe përfundoje me një fetë limoni.
2. Disaronno Fizz: i lehtë, citrus dhe freskues
Nëse Sour tregon anën më të plotë të Disaronno-s, Fizz shkon në drejtimin e kundërt. Është i gjatë, i lehtë dhe shumë i freskët, me vetëm pak limon për të balancuar ëmbëlsinë dhe sodë për t'i dhënë gjallëri.
Është receta më e thjeshtë nga të treja dhe pikërisht kjo e bën interesante: pak përbërës, përgatitje e shpejtë dhe një profil që funksionon shumë mirë si aperitiv ose për një pasdite të ngrohtë.
Përbërësit
• 45 ml Disaronno
• Pak lëng limoni të freskët
• 150 ml sodë ose ujë të gazuar
Përgatitja
Mbush një gotë me akull dhe shto Disaronno. Shto pak lëng limoni të freskët dhe plotësoje me sodë ose ujë të gazuar. Përzieje lehtë.
3. Disaronno Mule: freski me një karakter më pikant
Mule sjell një kontrast krejt tjetër. Lime-i i freskët dhe ginger beer i japin cocktail-it aciditet, aromë dhe një notë pikante që ndryshon mënyrën si perceptohet Disaronno.
Ëmbëlsia e likerit dhe karakteri i ginger beer plotësojnë njëri-tjetrin, duke krijuar një pije të freskët, por më të theksuar në shije se Fizz. Është zgjedhja për ata që duan një cocktail të thjeshtë, por me më shumë karakter.
Përbërësit
• 50 ml Disaronno
• 25 ml lëng lime i shtrydhur në moment
• 150 ml ginger beer
• Ginger i freskët për dekor
Përgatitja
Në një gotë Mule me akull shto Disaronno dhe lëngun e lime-it dhe përzieji. Plotësoje me ginger beer dhe përfundoje me pak ginger të freskët të grirë.
Një shishe, tre drejtime
Disaronno Sour, Fizz dhe Mule nisen nga e njëjta shishe, por përfundojnë në tre profile shumë të ndryshme. Sour luan me balancën mes ëmbëlsisë dhe aciditetit, Fizz e mban gjithçka të lehtë dhe të freskët, ndërsa Mule shton karakterin pikant të ginger beer.
Kjo është edhe arsyeja pse Disaronno funksionon kaq mirë në këtë seri: nuk kemi thjesht tre receta, por tre mënyra të ndryshme për ta zbuluar të njëjtën shije.
Zgjidhja e radhës varet vetëm nga momenti: Sour, Fizz apo Mule?
Recetat dhe fotografitë: Disaronno Originale – Official Recipe Book.
